Purposeful

Rëndësia e vendosjes së një qëllimi për tu arritur. Ne të gjithë jemi të aftë të krijojmë një lëvizje

Lëvizjet lindin kur individët mblidhen rreth një qëllimi të përbashkët. Udhëheqja e suksesshme kërkon një vizion të qartë të qëllimit të dikujt, aftësinë për të frymëzuar të tjerët të bashkëpunojnë drejt atij vizioni, duke i bindur ata që janë në pushtet të bëjnë atë që u kërkohet si dhe kapërcimin e pengesave e mos dorëzimin deri sa vizioni që është vendosur të arrihet.

Këto cilësi i kanë zakonisht të gjithë udhëheqësit që fillojnë një lëvizje në çdo fushë. Udhëheqësit që arrijnë të strukturojnë punën e tyre si lëvizje, me mbështetës pasionantë, do të jenë në gjendje të ndërtojnë një ekip të fortë dhe të kenë sukses në çdo fushë.

Për shembull edhe idetë e biznesit mund të fillojnë lëvizjet e ndryshimit. Ktheni vëmendjen tek Airbnb ose Uber që kanë ripërcaktuar idenë e punës në disa sektorë ose Tesla që përpiqet t’i bëjë udhëtimet më të përshtatshme ekologjikisht. Një nga elementët që më shpesh na pengon të fillojmë një lëvizje është frika se veprimet tona nuk kanë rëndësi. Për ta kapërcyer këtë, është e nevojshme të kuptohet se është qëllimi i një lëvizjeje që përcakton fushën e saj.

Nëse kur flasim për një lëvizje mendojmë për revolucione të mëdha që kanë ndryshuar botën, kjo nuk do të thotë se ndryshimet e filluara në qytetin ku jetojmë apo në shkollë nuk janë të rëndësishme ose vendimtare. Çdo veprim ka rëndësinë e tij në arritjen e qëllimit të një lëvizjeje, madje edhe ato më të voglat, e rëndësishme është të kesh një qëllim të qartë mbas të cilit je i apasionuar.

Përvojë nga jeta: pasi pothuajse takoi vdekjen, Manal Rostom vendosi të veshë hixhabin. Për t’iu kundërvënë kritikave të marra nga kompania, Manal krijon një komunitet në të cilin gratë që mbajnë hixhab mbështesin njëra-tjetrën. Grupi u rrit dhe falë mbështetjes së madhe në dispozicion, i shkruan Nike për të propozuar një fushatë reklamuese në favor të sportisteve që mbajnë hixhab. Nike pranon dhe në 2017 nis një linjë veshjesh sportive për sportistet e hixhabit.

Falë një qëllimi të përbashkët, një komunitet ka arritur të kapërcejë stereotipet dhe të sjellë ndryshime.

Si lindin lëvizjet. Nëse e dini qëllimin tuaj që në hapin e parë edhe një lëvizje e vogël mund të bëhet e madhe

Kombinimi i shumë veprimeve të vogla dhe bashkimi i individëve të ndryshëm është metoda e vetme që ka vërtetë fuqinë për të krijuar ndryshime, megjithatë nisja e veprimit mund të jetë e vështirë. 

Këtu gjeni disa arsye pse është e vështirë të ndërmarrësh veprime:

• Mendimi se s’mund të jeni të suksesshëm;





• Mungesa e mbështetjes;





• Mungesa e mjeteve;





• Mungesa e fondeve;

Frika është shkaku kryesor që i pengon shumë të fillojnë një lëvizje.

Një teknikë e dobishme është në vend që të pyesni “Pse mua?”, më mirë përdorni “Pse jo mua?”. Ky është një ndryshim i mendësisë për ta shtyrë veten të kapërcejë frikën dhe për të vepruar. 

Një metodë tjetër është të praktikoni, domethënë të bëni veprime të tjera që ju trembin dhe t’i thoni vetes “Nëse mund ta bëj këtë, mund të bëj gjithçka” dhe pyesni veten “A dua vërtet të jem ai person që humbet mundësitë prej frikës?”.

Thënë kështu, gjëja e rëndësishme është të filloni të veproni. Deri edhe veprimet më të parëndësishme mund të nxisin ndryshimin, ashtu siç ndodh kur jeni të parët që duartrokisni një shfaqje, e gjithë salla ju ndjek nëse keni guximin të bëni atë veprimin e parë të vogël.

Përvojë nga jeta: Sarah Kavanagh u bë vegane në moshën dymbëdhjetë vjeçare dhe filloi të kontrollonte përbërësit e ushqimeve që hante. Kështu zbuloi se vaji vegjetal i bromuar ishte një nga përbërësit në një nga pijet e saja të preferuara dhe se ishte i ndaluar në shumicën e vendeve të tjera. Më pas, nisi një peticion për t’i kërkuar Pepsi-t ta hiqte. Pas një muaji peticioni kishte arritur në 17,000 nënshkrime dhe tre muaj më vonë Pepsi njoftoi se do të zhdukte OVB nga pijet e saj, e të njejtën gjë bëri edhe Coca-Cola.

Falë besimit në qëllimin e saj, Sara kishte arritur t’ia dilte misionit të vendosur.

Si të shprehni vizionin tuaj dhe cilat janë teknikat për të frymëzuar mbështetësit e parë të lëvizjes suaj 

Hapi i parë në çdo lëvizje të suksesshme është krijimi i një vizioni të qartë dhe bindës për atë që dëshironi të arrini. Kjo do të jetë busulla që do t’ju udhëheqë përmes vështirësive. Vizioni është e ardhmja e dëshiruar ndërsa qëllimi është arsyeja pse doni ta arrini atë. Pasi të keni një vizion dhe qëllim të qartë, mund të krijoni një mision (çfarë të bëni), strategji dhe taktika (si ta bëni) dhe qëllime (sa mirë e bëni) për të arritur vizionin tuaj. 

Një metodë efektive për të komunikuar vizionin tuaj me ata që doni t’ju mbështesin është me histori të ndara në tre pjesë: një “histori e vetvetes” që ka të bëjë me qëllimin personal, një “histori e përbashkët” që përshkruan bashkësinë e njerëzve të cilët duam që të na mbështesin dhe gjënë që kemi të përbashkët, gjithashtu një “histori e së tashmes” që shfaq gjendjen e urgjencës për të vepruar tani. 

Një metodologji tjetër është “Teoria e Ndryshimit”, e cila nis nga vizioni juaj dhe pastaj vazhdon prapa për të identifikuar kushtet e nevojshme për ta zbatuar atë, në këtë mënyrë ju keni një udhëzues të qartë për përpjekjet tuaja. Hapi tjetër është gjetja e “Ndikuesve” të duhur, pra, individë me një numër njerëzish të cilët iu besojnë këtyre të fundit dhe sigurohuni që ata të ndiejnë se po marrin diçka me vlerë në këmbim të promovimit të tyre (për shembull, të kenë akses të parët tek një produkt ose ta marrin falas). Metodat për të përfituar nga bashkëpunimi me ndikuesit:

• Zhurma e bubullimave. Të sigurohesh që një numër i madh njerëzish promovojnë diçka në të njëjtën kohë, duke sjellë si rezultat vëmendje të madhe.





• Përcaktuesi i trendeve. Identifikoni makro-ndikuesin në një zonë dhe shtyjini që të inkurajojnë mikro-ndikuesit, në mënyrë që të shumëfishojnë mbështetjen për kauzën.





• Dëshmi sociale. Të shtysh një numër të madh të njerëzish “normalë”, domethënë jo ndikues, që të postojnë ose ndajnë kauzën/produktin.

Përvojë nga jeta: Katherine Krug, themeluesja e BetterBack, përdori algoritmet e Kickstarter në avantazhin e saj në fillimin e projektit të saj për ta bërë një nga më të njohurit. Katherine u kërkoi 120 miqve të investojnë një dollar në projektin e saj, në mënyrë që të shfaqej ndër më të njohurit (algoritmi për “më të njohurit” bazohet në numrin e investitorëve dhe jo në fondet e mbledhura). Më pas e ruajti këtë epërsi duke treguar vëmendje ndaj klientëve, duke iu përgjigjur pyetjeve të tyre menjëherë dhe duke iu ofruar zbritje dhe përditësime.

Si i bindni ata që kanë fuqinë për të realizuar vizionin tuaj? Teknika për t’i bindur ata me fuqi vendimmarrëse 

Zakonisht individët që kanë fuqi vendimmarrëse janë zyrtarë të zgjedhur ose presidentë të një kompanie dhe këto janë objektivat që një aktivist duhet ketë parasysh për t’i bindur këta.

Hapi i parë është të identifikoni qartë se kush është në gjendje të bëjë ndryshimin që nevojitet. Më pas duhet ta bëni propozimin tuaj tërheqës duke analizuar elementët që i shtyjnë ata që kanë fuqi vendimmarrëse të veprojnë. Për këtë qëllim, mund të krijohet një hartë, duke identifikuar marrëdhëniet dhe faktorët që ndikojnë tek individët me fuqi vendimmarrëse dhe sesi këto mund t’i shtyjnë në veprim.

Të jesh në gjendje të parashikosh të gjitha arsyet që do t’i shtyjnë personat me fuqi vendimmarrëse të thonë jo është një metodë efektive për të filluar nga një pozitë e favorshme. Në këtë kuptim është e dobishme të paraqitësh të dhëna të caktuara për të siguruar të gjithë informacionin e dobishëm për marrjen e një vendimi.

Vendimmarrësit zakonisht kalojnë pesë faza kur bien në kontakt me fushatat që i prekin:

• Mohimi. Vepron sikur të mos ketë ndodhur asgjë.





• Dëgjimi. Është gati të dëgjojë kërkesat. Nëse arrini të tregoni se ajo që kërkoni nuk do të mbrojë vetëm reputacionin tuaj, por mund të jetë e mirë për biznesin, ju keni një shans më të mirë për të marrë atë që dëshironi.





• Pranimi. Pas dëgjimit, vendimmarrësi pranon të veprojë.





• Kuptimi. Individët me fuqi vendimmarrëse pranojnë plotësisht pikëpamjen e aktivistëve dhe ofrojnë edhe më shumë se sa kërkohet.





• Përgjegjshmëria. Situata është e kundërt, ata që kanë fuqi vendimmarrëse u japin klientëve të tyre fuqinë të veprojnë në emër të tyre dhe të bëhen promovues të kauzave për të cilat kompania kujdeset.

Si të zbuloni se çfarë frymëzon mbështetësit tuaj dhe t’i mbani ata të motivuar?

Hapi tjetër, pas pastrimit të vizionit dhe ndërtimit të vrullit fillestar, është të mbash të motivuar dhe të frymëzuar mbështetësit duke zbuluar dhe kuptuar faktorët që i shtyjnë ata të veprojnë. 

Për shembull, ju mund t’i propozoni ekipit tuaj krijimin e një tabele motivuese:

• Listoni kategoritë e elementeve ose faktorëve që na japin motivim gjatë punës si mirënjohja, pagesa, etj.





• Tregoni me përqindje ndikimin që ka secila kategori tek ne,





• Përdorni një kod ngjyrash (të verdhë, të kuqe, jeshile) për të treguar sa të kënaqur jeni aktualisht në secilën kategori.

Zakonisht burimet më të zakonshme të motivimit janë:

Qëllimi

Njerëzit preferojnë të shpenzojnë energjinë e tyre në një punë që ata e konsiderojnë kuptimplote dhe të rëndësishme. Mënyra më e mirë për të frymëzuar mbështetësit tuaj është të nënvizoni historitë e atyre që ndikohen nga vizioni ynë.

Rritja

Të vazhdosh të mësosh dhe të ndihesh i sfiduar është një burim i fortë motivimi. Është mirë të vendosni pritshmëri të larta për ekipin tuaj dhe t’i mbështesni ata ndërsa përpiqen t’i arrijnë. Në këtë kuptim, mund të përdoret rregulli 90/10, domethënë, individët e ekipit duhet të jenë në gjendje të marrin 90% të vendimeve për punën e tyre vetë, ndërsa vetëm 10% duhet të kërkojnë miratimin e udhëheqësit.

Njohja

Individët ndihen të motivuar për të punuar me ata që respektojnë ose besojnë. Është mirë të krijohet një mjedis i sigurt dhe i hapur, ku njerëzit ndihen rehat të shprehen. Një mjedis në të cilin udhëheqësi kupton që mbështetësit e tyre gjithashtu kanë një jetë, një familje dhe interesa ose angazhime të tjera jashtë qëllimit për të cilin ata punojnë.

Përvojë nga jeta: Ndonjëherë të mos e marrit veten shumë seriozisht si udhëheqës është mënyra më e mirë për të ndërtuar besim dhe lidhje më të forta në ekipin tuaj. Jennifer Dulski e lejon ekipin e saj të zgjedhë kostumin e saj të Halloween, në fakt një herë u shfaq në punë me një kostum ngjyrë vjollce njëbrirësh kurse një herë tjetër me një kostum si hamburger gjigant.

Si ta trajtoni kritikën dhe ta përdorni në avantazhin tuaj

Kritika është pjesë përbërëse e çdo lëvizjeje/kompanie të suksesshme.

Disa janë një qëllim në vetvete ndërsa të tjerët mund të përmbajnë sugjerime të vlefshme. Gjëja e rëndësishme është të mbani mend se ju jeni në kontroll të reagimit tuaj ndaj tyre.

Gjetja e njerëzve që besojnë tek ne dhe në kauzën tonë është një teknikë e mirë për të përballuar kritikat, duke ndërtuar mure pozitiviteti zvogëlohet ndikimi negativ ndaj kritikës. Një lloj tjetër qasjeje efektive është përdorimi i kritikës si këshillë për përmirësim (veçanërisht kritika nga ekspertët e industrisë).

Përvojë nga jeta: Marie Lou Jepsen krijoi OLPC (“One Laptop per Child”, Një laptop për fëmijë) falë kritikave të kompanive të mëdha aziatike të kompjuterave. Kur Marie Lou themeloi OLPC, megjithëse kishte një kërkesë të madhe për laptopë të lirë me energji diellore, një numër i madh ekspertësh dhe jo ekspertësh këmbëngulën se produkti nuk mund të ndërtohej.

Mari Lou u takua me disa nga presidentët dhe ekspertët e kompanive kryesore aziatike të IT që e tallën dhe renditën të gjitha arsyet pse projekti nuk mund të funksiononte, por Mary Lou nuk u dorëzua dhe mbajti shënim të gjitha kritikat/sugjerimet konstruktive të marra në çdo takim.

Në fund, vetë njerëzit që kishin thënë vazhdimisht se projekti ishte i pamundur, falë kritikave të tyre, e ndihmuan ta realizonte.

Si të menaxhoni pengesat dhe të përballeni me dështimet në mënyrë më pozitive

Një metodë efektive për të kapërcyer pengesat është të jeni të vetëdijshëm se ato do të vijnë. Mund ta imagjinoni lëvizjen/sipërmarrjen tuaj si një mal të diellëzuar (kur gjithçka po shkon mirë) dhe të stuhishme (momentet e vështirësisë). Duhet të jeni gati të prisni ditë të stuhishme, të rrethoheni me burime dhe të përgatiteni për t’i përballuar ato, por të jeni të vetëdijshëm se dielli do të shkëlqejë sërish.

Pasi të jeni të vetëdijshëm dhe të gatshëm për probabilitetin e vështirësive, atëherë mund të filloni të mësoni prej tyre e prej dështimeve duke bërë një listë të gjërave që shkuan keq dhe arsyeve pse. Mund të krijoni një “Festival Dështimi” në kompaninë/lëvizjen tuaj dhe të inkurajoni skuadrën tuaj t’i ndajë dështimet, duke i kornizuar si momente mësimi prej gabimeve të kaluara, pa kurrfarë ndjenje turpi.

Të mësosh të ecësh përpara edhe kur has momente të vështira është një aftësi e rëndësishme për t’u zotëruar nëse dëshiron të arrish sukses. Prandaj është mirë të gjejmë aleatë që na mbështesin dhe të cilëve në të njëjtën kohë, duhet t’u japim llogari për progresin drejt qëllimit që duam të arrijmë. Është një metodë jashtëzakonisht efektive për të dhënë shtysën për të përballuar vështirësitë. Sipas hulumtimit, ndarja e qëllimeve me dikë të bën më të prirur për t’i arrijnë ato.

Një strategji tjetër efektive është gjetja e individëve që lulëzojnë gjatë kohës së krizës, ata që janë në gjendje t’i përballojnë me sukses, në mënyrë që t’i kemi pranë në momente të vështira dhe që të mësojmë prej tyre.

Përvoja e jetës: kur Benjamin Joffe-Walt drejtoi ekipin e komunikimit në Change.org, tha se për t’u përballur me momentet e krizës, duhet të distancohemi emocionalisht nga ndjenja e seriozitetit të situatës dhe ta konsiderojmë atë “argëtuese”. Kjo nuk do të thotë se situata bëhet më pak serioze, por i ndihmon individët të përqëndrohen në zgjidhje dhe të jenë të vetëdijshëm për atë që mund të mësohet nga zgjidhja e krizës. Ështe një mënyrë e shkëlqyeshme për t’u përballur me presionin, çdo krizë bëhet “argëtuese”.